屯門人口愈來愈多，美食都愈來愈多，得知屯門有間隱世甜品店出左款三層高既Pancake，放上檯度時仲震騰騰，呃到唔少Like，真係幾吸引。好啦，老遠都要過黎試下！兩位丫唔該。老闆娘：「要等一個半鐘頭喎。」 我當堂嚇一跳，而途中都有唔少人黎想攞位，但好多人都比佢等候時間嚇窒而離開。嘩！我心諗，真係好犀厲，keep住有人黎又keep住趕客咁。
店子細細又估唔到咁多款甜品喎，而好有趣地，佢menu係無佢招牌梳乎厘Pancake，要睇佢電子版menu先見到。嘩！你無睇錯，招牌限定巨人Pancake要等40－60分鐘......唔好諗叫左先。
焦糖脆脆海鹽焦糖醬法式可麗餅 HK$52 － 可麗餅煎得半脆半軟身，口感微脆煙韌。
中間有一球Movenpick焦糖雪糕，旁邊仲加有焦糖脆脆同焦糖醬，焦糖迷就應該勁冧啦。
熱戀 HKD$75 － 表面有用糖醬煮過梨肉，所以食落都偏甜。另外個Pancake就可能over cook，明顯不夠挺身同有d燶燶地既表面。有蛋香味但鬆軟度不夠，同埋食到發粉味，有待改善。
招牌巨人班戟 HKD$98 - 由三塊梳乎厘Pancake疊起而成，差少少有成隻手指甘高，放上檯度時又真係震騰騰喎。Movenpick士多啤梨雪糕配上雜莓醬，甜酸度都算係ok。Pancake入口質感漿漿地，因為都見係入面偏濕，有少少蛋香，但如果係叫梳乎厘Pancake，真係叫人失望，時間同火力都未做得好，真係似趕收工十二點無車甘，貿素好一般過一般。所以下次大家去食野，唔好盡信晒d媒體介紹，要信既就要信自己既味覺。
班戟館
(屯門店)
屯門井財街9號地下20B號舖
營業時間: 星期一18:00-00:00
星期二14:00-00:00
星期三18:00-00:00
星期四至日14:00-00:00
沒有留言:
張貼留言