平日OT做到隻狗，慳慳埋埋都係想食返餐好，今次一次過滿足我三個願望！
1) 一片片新鮮白松露放入口，2) 美食配靚酒，3) 入口即融鮮甜海膽
灣仔Palco Ristorante，食咗個HK$1988晚餐，有海膽雀巢，聖子皇伴魚子醬，
嫩薑花蟹濃湯燉 ，24個月巴馬 芝士新鮮白松露意粉，慢煮紅鯛伴法國龍蝦仔。
當然唔少得我最愛甜品，芒果熱情果雪糕伴椰子泡沫。重加錢配埋酒，你都咪話，真爽啊！
第一道前菜－海膽雀巢配上Homemade Flavor Ginger Ale：
賣相好吸引，石頭綠葉配橙色雀巢，綠色的牛油果醬帶有清新的柚子味道
配煙煙韌韌豬臉頰肥肉，柚子味道中和肥膩感覺 。中間有海膽，入口即融鮮甜無比，雀巢脆卜卜，配上Homemade Flavor Ginger Ale帶有花，西柚香氣，味道帶薑辣、橙味，入口酸酸甜甜，餐前開胃特飲！
配合度： 7/10
聖子鮮甜爽口，帶有香蒜味道，味道有層次得來亦鮮味爆發，配上Champagne Delamotte Brut, N.V 帶有清新青蘋果味香檳，而且酸度高，可以令聖子更加鮮甜！
配合度： 8.5/10
第三道菜－嫩薑花蟹濃湯燉配自家製海鹽蜜糖牛油配麵包:
賣相好吸引有金箔和蔥花在蟹肉上點綴，上層蟹肉入口鮮甜，湯底海鮮味濃郁和燉蛋一起吃，口感好Rich。
自家製海鹽蜜糖牛油配麵包－嘩！一入口蜜糖牛油味濃郁，我即刻諗起Winnie The Pooh 果樽蜜糖呀！我覺得自己好此一隻肥熊haha！
大廚阿Ken表演，倒冧酒在芝士面，再點火，
表演完咗，終於有得食啦！
第四道菜24個月巴馬臣芝士新鮮白松露意粉配Scanavino Barolo D.O.C.G, Piemonte, Italy 2010:
意粉一上檯，馬上有人將一個新鮮白松露刨成一片片薄片飄落意粉上，好正啊！入口芝士味道濃郁，不過吃多會膩，配意大利紅酒Scanavino Barolo D.O.C.G, Piemonte, Italy 2010,將口腔裡面芝士炸開，令口感變得清新。值得一試!
配合度： 9/10
第五道菜－自家製青檸雪葩，食完濃味野，食個酸酸甜甜青檸雪葩清一清個口腔，去肥膩感！
第六道主菜－慢煮紅鯛伴法國龍蝦仔配Twinwoods Estate Chardonnay, Margaret River, Australia ,2014 :
一咬下紅鯛連鱗 ，嘩！ 香脆到不得了, 魚肉嫩滑，瞳孔馬上放大了！ 原來用300度滾油淋上面，令魚鱗脆卜卜，加上咸鮮魚子醬和鮮味彈牙的龍蝦肉, 再配上 Twinwoods Estate Chardonnay,還可以的.
配合度： 7/10
第七道菜甜品 －芒果熱情果雪糕伴椰子泡沫配Mascato d Asti D.O.C.G Piemonte Italy, 2015:
熱情的小黃花配上酸酸甜甜的熱情果雪糕和椰子雪芭加上芒果粒, 令人有開心的感覺!
總廚心血來潮造了另一款甜品, 一粒粒出煙的石頭, 賣相令人有驚喜, 原來係竹炭朱古力雪糕.
外層竹炭味朱古力脆卜卜, 裡面朱古力雪糕又香又滑,唔太甜,真係好特別!
